Presentation en Occitan

La LPO, qu’es aquò?

La LPO (Liga per la proteccion dels aucèls) es una Associacion lei de 1901, que son sèti se trapa a las Fondariás Reialas a Ròcafòrt. Es una de las primièras associacions de proteccion de la natura en França. Òbra al quotidian per la salvagarda de la biodiversitat a partir de sa vocacion primièra, la proteccion dels aucèls.
La LPO es estada creada en 1912 per faire acabar lo chaple del Martinòt, aucèl de la mar qu’es vengut lo simbòl de l’associacion. Es estada reconeguda d’utilitat publica en 1986. Lo director es Yves Vérilhac e lo president Allain Bougrain-Dubourg.
La LPO es lo representant francés de Birdlife International, aligança mondiala que recampa mai de 100 organizacions de proteccion de la natura (2.3 milions d’aderents dins lo mond).
Abelhòla ©C.Rambal
Son activitat es articulada a l'entorn de 3 grandas missions :
La Proteccion de las espècias : per l’evaluacion dels estatuts de las espècias mercé a la realizacion d’inventaris e d’enquèstas, per la mesa en plaça de plans d’accions que la tòca es la conservacion de las espècias las mai menaçadas ; per la Mission Rapaces que visa a preservar l’ensemble de las populacions de rapaces e programar de reintroduccions per las populacions las mai flacas e per lo programa Fauna Salvatja en Destressa que consistís a sonhar los animals dins la tòca de los relargar dins lor mitan.
La preservacion dels espacis : la LPO es gestionària de 169 espacis naturals ont se trapan 12 resèrvas naturalas e 7 resèrvas naturalas regionalas, es activa dins 507 sites Natura 2000, participa e se met en davant per una agricultura durabla e es partenària del programa europenc FAME que la tòca es d’aumentar las coneissenças e los mejans de proteccion dels mitans marins lo long del litoral Atlantic.
L’Educacion e la sensibilizacion : la LPO edita de revistas naturalistas e met en plaça d’accions pedagogicas e de sensibilizacion, per los grops escolaris o lo grand public, destinat a faire descobrir los secrèts de la natura, sa vulnerabilitat e los mejans per la protegir.
« De las planas viticòlas als causses, del litoral a la garriga,
actors del quotidian, per la proteccion de la biodiversitat
sul territòri eraurés »
Endralhada per un relai LPO en 2001 puèi per un grop LPO en 2003, una associacion locala en 2008, la LPO en Erau es desempuèi 2021, una delegation territoriala de la LPO Occitanie forta d’un malhum d’aderents de 1261 sòcis en 2023 en Erau qu’ òbran pels aucèls, la fauna salvatja, la natura e l’òme e luchan contra lo declin de la biodiversitat per la coneissença, la proteccion, l’educacion e la mobilizacion dins lo departament d’Erau.
La LPO Occitanie Délégation Territoriale Erau es presidida per Pierre Maigre e bailejada per Nicolas Saulnier. Dispausa d’un Consèlh Territorial compausat de 18 sòcis.
200 benevòls actius e 17 salariats s’investisson dins los diferents sectors d’accion.
- Vida Associativa
- Conservacion
- Expertesa
- Educacion a l’environament e al Desvolopament durable
- Administracion
La LPO Occitanie Délégation Territoriale Erau a inaugurat la dobèrtura de sos locals e de son centre regional de salvagarda de la fauna salvatja lo 23 de junh de 2012. Son sèti regional es ara a Villeveyrac (Vilamanda).
Gach blau ©C.Rambal
Partager
Share

Les commentaires sont clos.